Allir voru með á æfingasvæði Bayern - Ísak að stíga upp úr veikindum

Íslenska landsliðið æfði í morgun við frábærar aðstæður á æfingasvæði Bayern München. Á morgun verður flogið yfir til Bosníu þar sem leikurinn mikilvægi fer fram á fimmtudaginn.

Æft var á svæði þar sem yngri lið Bayern og kvennaliðið æfa og spila. Karlaliðið er svo með annað æfingasvæði sem er í hinum enda borgarinnar.

Allir leikmenn í hópnum tóku þátt í æfingunni þær fimmtán mínútur sem fjölmiðlar fengu að fylgjast með. Þar á meðal Ísak Bergmann Jóhannesson sem hefur verið veikur og lék ekki með FCK um liðna helgi.