Philippe Coutinho mætir sínum gömlu félögum í undanúrslitum Meistaradeildarinnar. Coutinho, sem að spilar með Barcelona í dag, segist stressaður að mæta sínu gamla félagi, Liverpool.
„Þessir leikir verða sérstakir fyrir mig. Ég er orðinn stressaður af því að ég veit að það styttist í þessa stund. Þetta verða sérstök kvöld," sagði Coutinho eftir sigurinn á Real Sociedad í gær.
Coutinho gekk í raðir Barcelona frá Liverpool í janúar í fyrra. Síðan þá hefur hann leikið 49 leiki og skorað í þeim þrettán mörk.
Hann skoraði eitt marka Barcelona gegn Manchester United í 8-liða úrslitum Meistaradeildarinnar í vikunni. Hann fagnaði með því að halda fyrir eyrun á sér.
„Þetta er ekki skot á neinn. Ég virði alla og er þakklátur fyrir stuðninginn. Ég held fyrir eyrun til þess að halda einbeitingunni betur á því sem ég er að gera."
Fyrri leikur liðanna fer fram á Camp Nou í Barcelona þann 1. maí.
Athugasemdir
