Guardiola: Eins og fólk skilji ekki að við getum tapað

Eftir leikinn gagnrýndi hann fjölmiðla fyrir umfjöllunina eftir 3-1 tap gegn Norwich um síðustu helgi.

„Haldið þið að þessir leikmenn þurfi ennþá að sanna eitthvað eftir að hafa unnið úrvalsdeildina tvö ár í röð? Það er eins og fólk skilji ekki að við getum líka tapað leikjum," sagði Guardiola.

„Ég er hissa að fyrrum atvinnumenn sem eru knattspyrnusérfræðingar í dag skilji þetta ekki. Við getum tapað leikjum eins og öll önnur lið, það er undir okkur komið að sanna fyrir sjálfum okkur að við höfum ennþá metnaðinn til að vinna titla."

Bernardo Silva fékk mikið lof að leikslokum enda skoraði hann þrennu í stórsigrinum.

„Bernardo Silva var besti leikmaðurinn okkar á síðustu leiktíð. Hann þarf ekki að skora hérna til að sanna að hann sé góður leikmaður."

Man City er í öðru sæti deildarinnar, með þrettán stig eftir sex umferðir. Liverpool er á toppinum og getur aukið forystuna í fimm stig með sigri á morgun.