Sporin voru skiljanlega þung fyrir þjálfara Njarðvíkur Gunnar Heiðar Þorvaldsson þjálfara Njarðvíkur í viðtal eftir 3-0 tap hans manna gegn Keflavík í siðari leik liðanna í undanúrslitum umspils Lengjudeildarinnar í dag. Tapið þýddi að Njarðvík situr eftir með sárt ennið og þarf að horfa á eftir grönnum sínum á Laugardalsvöll sem munu leika þar næst komandi laugardag um sæti í Bestu deildinni. Gefum Gunnari orðið.
Lestu um leikinn: Njarðvík 0 - 3 Keflavík
„Þetta er gríðarlega þungt og mikil vonbrigði. Sérstaklega í ljós þess hvernig við mættum til leiks hérna. Mér fannst við gera virkilega vel í fyrri hálfleik þar sem við lokum á allt sem þeir voru að gera. Þeir sköpuðu sér lítið sem ekki neitt á meðan við fáum tækifæri til þess að skora þegar Valdimar fer einn innfyrir og mark hefði breytt gríðarlega miklu.“
Markalaust var í hálfleik og fór Gunnar yfir málin með sínu liði í hálfleik. En það voru þó Keflvíkingar sem reiddu fyrst til höggs og komust yfir snemma í síðari hálfleik.
„Við förum inn í hálfleik og förum yfir þá hluti sem við vildum gera betur. En því miður og ekki í fyrsta skipti í sumar þegar verið er að herja á okkur að þá verðum við oft svolítið litlir.“
Umdeild atvik átti sér stað þegar Keflavík fékk óbeina aukaspyrnu inn í teig Njarðvíkur eftir að Þórður Þorsteinn Þórðarson dómari leiksins mat það sem svo að varnarmaður heimamanna hefði átt sendingu til baka á markmann sem tók boltann upp í hendur sér. Upp úr spyrnunni skoraði Keflavík annað mark sitt í leiknum. Hvernig horfði atvikið við Gunnari?
„Ég bara sé það ekki nægjanlega vel ef ég á að segja alveg eins og er.“
Gunnar Heiðar er að ljúka sínu öðru heila tímabili með Njarðvík eftir að hafa tekið við liðinu á miðju sumri árið 2023. Hvað býr í hans framtíð? Verður hann áfram með lið Njarðvíkur?
„Bara ekki hugmynd. Ég er að verða atvinnulaus núna og er bara svo ógeðslega svekktur með hvernig við endum þetta eftir allt sem við lögðum í þetta.“
Sagði Gunnar en allt viðtalið við hann má sjá hér að ofan
Athugasemdir
