Manchester United var talsvert meira með boltann í kvöld en gekk ekkert að koma boltanum í netið. Chris Wood kom Burnley yfir með marki eftir fast leikatriði á 39. mínútu.

Ben Mee skallaði þá boltann áfram eftir aukaspyrnu og Wood var fyrstur að átta sig. Jay Rodriguez kom þá Burnley í 0-2 á 56. mínútu þegar hann skoraði með frábæru skoti, sláin inn.

United sótti og sótti en boltinn vildi ekki í netið. Nick Pope stóð fyrir sínu í marki Burnley en United þarf að gera talsvert betur í sóknarleik sínum. Stuðningsmenn United kölluðu í kvöld eftir því að fá United liðið sitt aftur og ólíklegt verður að teljast að þetta hafi verið það sem þeir vildu sjá.

Burnley virkaði sjaldan ef einhvern tímann líklegt til að fá á sig mark í kvöld. Annar sigur liðsins í röð staðreynd og þetta var annar deildarleikurinn í röð sem United tapar.