Sigurvin Ólafsson og Aron Snær Ingason.
Lengjudeildin hefst á föstudaginn en stórleikur 1. umferðar verður í Laugardalnum þegar Þróttur og Njarðvík mætast á laugardaginn. Bæði lið voru nálægt því að komast upp í fyrra og eru með yfirlýst markmið að spila í Bestu deildinni á næsta ári.
„Frábært að þetta sé að fara af stað. Skemmtilegt að fá svona verðugt verkefni strax í byrjun. Lengjudeildin hefur verið rússíbani síðustu árin og erfitt að spá fyrir um hvað er að fara að gerat. Það er enn frekar þannig í ár. Það eru fleiri lið með raunhæfar væntingar um að fara upp," segir Sigurvin Ólafsson, þjálfari Þróttar.
Hann reiknar með feikilega sterkri deild í sumar.
„Mér fannst menn streyma upp úr Lengjudeildina í Bestu deildina í fyrra en það er að snúast við, það er svona bakflæði. Fullt af mönnum sem voru í Bestu deildinni í fyrra eru í hinum og þessum Lengjudeildarliðum. Það eykur bara standardinn og gæðin, það er allt á uppleið."
Njarðvíkingar hafa styrkt sig vel í vetur undir stjórn Davíðs Smára Lamude og Sigurvin býst við mjög erfiðum leik.
„Það eru styrkleikar hvert sem þú lítur þar, frábærar og nánast lygilegar viðbætur. Ég get nefnt Alexander Helga núna síðast, Eið Aron, Guy Smit og ég get haldið áfram. Á móti hafa þeir auðvitað misst einhverja menn líka en frábærir leikmenn og flottur þjálfari. Lið með væntingar um að gera vel í sumar rétt eins og við."
Sóknarleikmaðurinn Aron Snær Ingason er eftirsóttur og Valur hefur samkvæmt heimildum gert tilboð í hann. Þróttarar vilja ekki missa Aron og Sigurvin segir það klárt mál að hann sé ekki á förum.
„Nei. Það er ekki planið. Aron er bara klár í verkefnið hérna með okkur, honum líður vel og er ekki að fara neitt"
Svona er fyrsta umferðin í Lengjudeild karla:
föstudagur 24. apríl
19:15 Fylkir-Ægir (tekk VÖLLURINN)
19:15 Afturelding-ÍR (Malbikstöðin að Varmá)
laugardagur 25. apríl
14:00 Vestri-Grindavík (Kerecisvöllurinn)
14:00 Þróttur R.-Njarðvík (AVIS völlurinn)
16:00 Völsungur-Leiknir R. (GPG völlurinn)
16:00 HK-Grótta (Kórinn)
