Selfyssingar þykja líklegir til afreka í Pepsi Max-deildinni í sumar með Dagnýju, Hólmfríði Magnúsdóttur og Önnu Björk Kristjánsdóttur í fararbroddi. Bára Kristbjörg Rúnarsdóttir, Hulda Mýrdal og Mista Rúnarsdóttir ræddu Selfoss og önnur lið Pepsi Max-deildarinnar í Heimavellinum en Bára setur spurningamerki við Dagnýju fyrir sumarið.

„Það getur vel verið að hún verði besti leikmaður deildarinnar, en ég er ekki sannfærð um það verði þannig bara að því hún heitir Dagný Brynjarsdóttir," sagði Bára, en Dagný hefur á síðustu árum eignast barn og verið í meiðslum.

Hulda hefur mikla trú á því að Dagný geti leitt lið Selfoss áfram í sumar. „Þó að Dagný sæti á stól inn á vellinum þá gæti hún keyrt þær áfram. Það að hún sé þarna, þó að hún væri 50 prósent, með þessum stelpum sem urðu bikarmeistarar í fyrra, með hana þá held ég að þær trúi að þær geti náð lengra," sagði hún.

Þá sagði Bára: „Ekki misskilja, hún gefur liðinu helling og hún gefur þeim sjálfstraust. Ég er bara ekki sannfærð því pressan sem er sett á að vera hún í þessu liði er það mikil að ég er ekki viss um hún geti nokkurn tímann staðið undir henni."

Mist telur hins vegar að pressan sé ekki það mikil á Dagný núna. „Þú ert komin með Önnu Björk sem er geggjaður leiðtogi, landsliðskona og frábær leikmaður. Svo ertu með nýjan markvörð sem pressa er á að standi sig og svo ertu með leikmenn sem stimpluðu sig ótrúlega vel inn í fyrra, eins og Karitas og Barbára. Hólmfríður verður vonandi á svipuðu róli og svo ertu komin með Clöru inn í þetta. Þetta eru það margir öflugir einstaklingar og byrjunarliðið þeirra verður mjög gott."

Selfoss heillaði ekki á undirbúningstímabilinu, en Bára kveðst spennt fyrir að sjá liðið í sumar. „Ég er fáránlega spennt fyrir þessu liði og mér finnst þær hafa góðan þjálfara. Þær eiga eftir að gera vel, hversu vel er spurning fyrir mér."

Umræðuna má hlusta á í heild sinni hér að neðan.