Sigurvin Ólafsson, þjálfari Þróttar
Sigurvin „Venni'' Ólafsson, þjálfari Þróttar, var alls ekki sáttur eftir að lið hans Þróttur tapaði 4-3 gegn Aftureldingu í kvöld., en hann sagðist að honum hafi sjaldan liðið eins illa eftir leik.
Lestu um leikinn: Afturelding 4 - 3 Þróttur R.
„Meiri partinn fannst mér við frábærir, og líklega var þetta okkar besti leikur'', sagði Venni eftir leik.
Það skyggði þó aðeins á leikinn á 12. mínútu þegar Axel Óskar, leikmaður Aftureldingar, og Aron Snær, leikmaður Þróttar, lentu í samstuði. Úr því þurfti að hringja á sjúkrabíl fyrir báða aðila, en óhætt er að segja að Axel hafi lent betur í þessu samstuði en Aron.
„Við vitum ekki stöðuna á Aroni, því miður. Þetta var hræðileg árás frá Axeli, varnarmanni Aftureldingar, sem hann hefði átt að fá rautt fyrir það að senda minn leikmann upp á sjúkrahús.''
„Við vorum eitthvað pirraðir út í dómarann en ég sagði við strákana í hálfleik að við ætluðum ekki að falla í þann pitt og vorkenna okkur. Okkur fannst vítaspyrnudómurinn mjög skrýtinn en það er „loser attitude'' að fara inn í klefa og væla yfir hvernig er dæmt á móti okkur. ''
Við þurfum líka að spila það vel að það skipti ekki máli að þó við fáum einhverja dóma sem okkur finnast ekki sanngjarnir. Við jöfnum sanngjarnt fannst mér og vorum ofan á. Strákarnir sýndu frábæran leik og ég er sorgmæddur fyrir þeirra hönd að hafa ekki náð stigi úr þessum leik..
Magnús Þórðarson fékk annað gult spjald á 89. mínútu fyrir klaufalegt og óþarfa brot.
„Magnús veit að þetta var óþarfi og við erum búnir að ræða það. Hann rétt stígur yfir þessa línu þar sem við viljum sýna hamagang og ástríðu''.
„Hann setur hendina í andlitið á honum og andlitið er yfirleitt eitthvað stórhættulegt svæði þar sem allir fá gult eða rautt fyrir nema þegar þeir eru skallaðir inn á sjúkrahús, þá er ekkert spjald.''
Eftir þennan leik situr Þróttur í efsta sæti Lengjudeildarinnar með 10 stig, jafnir Aftureldingu. Þróttur á svo heimaleik í næstu umferð gegn Gróttu.
Viðtalið má sjá í heild sinni í spilaranum fyrir ofan.
