Roy Keane, fyrrum leikmaður Manchester United og núverandi sparkspekingur á ITV, getur ekki með nokkru móti skilið Ben Chilwell og Mason Mount en þeir eru í sóttkví eftir að Billy Gilmour greindist með Covid-19.
Gilmour greindist með Covid-19 eftir markalausa jafnteflið gegn Englendingum en eftir leik talaði hann við Mason Mount og Ben Chilwell.
Þeir spila allir saman hjá Chelsea og voru afar vinalegir á vellinum en það hafði afleiðingar. Gilmour er ekki með Skotum gegn Króötum í kvöld og þá eru Mount og Chilwell ekki með Englendingum og gætu misst af 16-liða úrslitum mótsins.
Keane skilur ekkert í Mount og Chilwell.
„Það eina sem ég skil ekki er af hverju ættir þú að vilja tala við mótherjann? Þeir töluðu saman í 20 mínútur og mér er alveg sama þó svo hann sé liðsfélagi þinn eða ekki," sagði Keane.
„Ég nenni varla að tala við fólk í meira en fimm mínútur. Af hverju myndir þú vilja tala við einhvern í svona langan tíma þegar þú varst í stríði við leikmanninn. Þeir hefðu átt að vita betur," sagði hann ennfremur.
Athugasemdir