Varnarmaðurinn fjölhæfi Waldemar Anton mun ganga til liðs við Borussia Dortmund í sumar.
Waldemar er 27 ára gamall og leikur sem miðvörður að upplagi, en getur einnig spilað í stöðu hægri bakvarðar eða varnartengiliðs á miðjunni.
Hann er í þýska landsliðshópnum sem spilar EM á heimavelli eftir að hafa átt frábært tímabil með Stuttgart í þýsku deildinni.
Waldemar er með 22,5 milljón evru söluákvæði í samningi sínum við Stuttgart og hafa mörg stór félög verið orðuð við hann undanfarna mánuði, en Bayer Leverkusen og Dortmund leiddu kapphlaupið.
Nú er komið í ljós að Dortmund hefur unnið kappið og mun tilkynna Waldemar Anton sem nýjan leikmann á næstu dögum.
Waldemar er fæddur í Úsbekistan en flutti ungur til Þýskalands með fjölskyldu sinni.
Athugasemdir