„Þetta var mjög lélegur fótboltaleikur, hjá báðum liðum. Þetta var eins og að horfa á æfingaleik í janúar í Egilshöll, eða Boganum. Greinilegt að bæði lið höfðu að litlu að keppa og leikurinn bar þess merki," sagði Vigfús Arnar Jósepsson, þjálfari Leiknis eftir tap gegn Þór á Akureyri í dag.
Lestu um leikinn: Þór 3 - 1 Leiknir R.
„Mér fannst rauða spjaldið verða þvæla, menn að kýtast á vellinum og kannski allt í lagi að spjalda þá báða. Þetta var eitt glímubragð og báðir stóðu upp, ekkert vesen. Dómarinn átti að gefa þeim gult spjald og láta leikinn halda áfram."
Vigfús tók við liðinu að þremur leikjum loknum í mótinu sem allir höfðu tapast. Hann er ekki ósáttur við gengi liðsins síðan þá.
„Sumarið hefur verið ágætt hjá okkur, við vorum í vondum málum framan af og vorum ekki að spila vel. Svo réttum við úr kútnum og endum deildina í sjöunda sæti og vorum í því tólfta þegar ég tók við. Ég er þokkalega sáttur við liðið og strákarnir hafa staðið sig mjög vel, þó að þessi leikur hafi ekki verið til útflutnings."
Athugasemdir
