Bose mótið: Kristín Erna skoraði fyrir KR í sigri

KR vann 2 - 3 sigur á Keflavík þegar liðin mættust í 2. umferðinni í Bose-móti kvenna í kvöld.

Leikið var í Reykjaneshöllinni en bæði lið höfðu tapað stórt í fyrstu umferðinni, Keflavík gegn FH og KR gegn Val.

Kristín Erna Sigurlásdóttir leikmaður ÍBV spilaði með KR í kvöld og það var hún sem skoraði fyrsta mark leiksins á 25. mínútu.

Keflavík jafnaði með marki Natasha Anasi og staðan í hálfleik 1-1.

Sveindís Jane Jónsdóttir er líklega á förum frá Keflavík eftir að liðið féll úr Pepsi Max-deildinni en hefur ekki enn valið sér lið og er enn hjá Keflavík. Hún kom liðinu í 2-1 strax í upphafi síðari hálfleiks.

Betsy Hassett jafnaði metin eftir klukkutíma leik og Hildur Björg Kristjánsdóttir skoraði sigurmark í lokin.