Gylfi Þór Sigurðsson.
Eins og sagt var fyrst frá á Fótbolta.net hér í síðustu viku þá er Gylfi Þór Sigurðsson mættur heim til Íslands eftir að hafa verið tvö ár í farbanni.
Gylfi var handtekinn í júlí 2021, grunaður um kynferðisbrot gegn ólögráða einstaklingi en það mál hefur núna verið fellt niður eftir langa rannsókn.
Gylfi hefur verið í farbanni í tæplega tvö ár og verið fastur á Englandi út af málinu en hann er núna mættur heim eftir að hafa fengið grænt ljós á að ferðast aftur.
Ekki er víst hvort að Gylfi muni endurvekja fótboltaferil sinn en ef hann gerir þá gæti hann mögulega gert það í Bestu deildinni.
„Það er spurning hvort að hann kíki á einhverjar æfingar hér heima," sagði Elvar Geir Magnússon í útvarpsþættinum. „Æfi með FH?" skaut Tómas Þór Þórðarson inn í en Gylfi er FH-ingur.
„Hversu stórt yrði það fyrir Bestu deildina ef hann myndi henda sér í hana?" spurði Elvar Geir.
„Það yrði svakalegt, alveg svakalegt," sagði Tómas Þór og er alveg hægt að taka undir það.
Gylfi er 33 ára og hefur skorað 25 mörk í 78 landsleikjum fyrir Ísland, hann á stóran þátt í því að Ísland komst á EM og HM. Hann lék síðast fyrir landsliðið í nóvember 2020. Óvíst er hvort að hann snúi aftur á fótboltavöllinn en nýr landsliðsþjálfari Íslands, Age Hareide, segir að Gylfi verði í plönum sínum ef hann mun gera það.
Athugasemdir
