Spánn um helgina - Real og Barca á útivelli

Madrídingar eru í slæmri stöðu á miklu vonbrigðatímabili, níu stigum á eftir toppliði Barcelona þegar sex umferðir eru eftir af deildartímabilinu.

Leikur kvöldsins gegn Betis verður afar erfiður enda eru heimamenn í baráttu um sæti í Evrópudeildinni fyrir næsta haust.

Ríkjandi meistarar Barcelona eru á góðri leið með að verja titilinn og heimsækja þeir Getafe á morgun.

Alavés spilar við Mallorca í spennandi fallbaráttuslag áður en Valencia og Girona mætast, en þau eru einnig með í fallbaráttunni á gríðarlega spennandi lokakafla tímabilsins.

Atlético Madrid er búið að tapa fjórum leikjum í röð en siglir áfram lygnan sjó í meistaradeildarsæti. Lærlingar Diego Simeone spila við Athletic Bilbao í kvöld, en gestirnir frá Bilbao eru í baráttu um síðustu evrópusætin.

Orri Steinn Óskarsson og félagar í liði Real Sociedad eru einnig í evrópubaráttunni og heimsækja Rayo Vallecano í hádegisleiknum á sunnudag. Svo eru fallbaráttuslagir áður en Villarreal mætir Celta Vigo í áhugaverðum slag.

Að lokum mætast Espanyol og Levante í fallbaráttuslag á mánudagskvöldið.

Föstudagur:
19:00 Real Betis - Real Madrid

Laugardagur:
12:00 Alaves - Mallorca
14:15 Getafe - Barcelona
16:30 Valencia - Girona
19:00 Atletico Madrid - Athletic Bilbao

Sunnudagur:
12:00 Rayo Vallecano - Real Sociedad
14:15 Real Oviedo - Elche
16:30 Osasuna - Sevilla
19:00 Villarreal - Celta Vigo

Mánudagur:
19:00 Espanyol - Levante