Jóhannes Karl Guðjónsson var ánægður með stigin þrjú sem hans menn í ÍA fengu með 2-1 sigri gegn ÍBV fyrr í dag. Eyjamenn eru því fallnir úr efstu deild.
Eyjamenn mættu sprækir til leiks en Skagamenn tóku stjórn á leiknum og komust tveimur mörkum yfir.
„Við vissum að þeir yrðu sprækir, þeir áttu hörkuleik gegn KA í síðustu umferð og geta verið erfiðir viðureignar. Þeir komust inn í leikinn með markinu frá Gary og það var kannski pínu stress í lokin en við díluðum vel við þessa löngu bolta frá þeim," sagði Jói Kalli að leikslokum.
Skagamenn eru núna komnir sjö stigum fyrir ofan fallsvæðið og aðeins þremur stigum frá Evrópubaráttunni.
„Við erum bara með okkar markmið. Við viljum að fólkið sem kemur að styðja við bakið á okkur hafi gaman af því og þau séu stolt af því að vera Skagamenn. Það er það sem skiptir okkur gríðarlega miklu máli.
„Stigasöfnunin sem við höfum verið í er bara fín, það er gott útlit fyrir að við náum okkar markmiði."
