„Við ætluðum okkur sigur, það er nokkuð ljóst," sagði Jakob Leó Bjarnason, þjálfari Hauka, eftir svekkjandi tap gegn Keflavík í mikilvægum leik í Lengjudeild kvenna í kvöld.
Lestu um leikinn: Keflavík 1 - 0 Haukar
Haukar þurftu á sigri að halda til að blása alvöru lífi í baráttuna um að komast upp í Pepsi Max-deildina. Leikurinn endaði með 1-0 sigri Keflavíkur og eru Haukar núna sjö stigum á eftir Keflavík þegar þrír leikir eru eftir.
„Við höldum áfram, klárum okkar leiki og sjáum hvað setur," sagði Jakob um möguleika Hauka á að komast upp um deild.
Þetta var frestaður leikur. Telur Jakob að stigasöfnun liðsins væri öðruvísi ef deildin hefði spilast með eðlilegu móti?
„Þetta Covid dæmi setur strik í reikninginn fyrir lið í öllum deildum. Þetta er mjög skrýtið allt saman og þetta getur auðvitað hitt verr fyrir sum lið. Nei, ég held ekki. Mér fannst við heilt yfir betri í þessum leik og áttum alla vega að fá stig."
„Framhaldið er skemmtilegt og spennandi. Við teljum okkur vera á meðal bestu liða í deildinni og það er þá gaman að mæta þeim bestu," sagði Jakob en Haukar eiga eftir að mæta tveimur efstu liðum deildarinnar.
Athugasemdir