Venni: Ef þetta eru lög þá þarf að óska eftir lagabreytingu

„Ég var mjög ánægður með leikinn af okkar hálfu. Þetta var að vísu mjög erfitt í fyrri hálfleik á móti vindi og hríð. En við vorum hugrakkir og reyndum að spila okkur í gegnum Íslandsmeistarana. Ég var ánægður með hugrekkið þó að það hafi legið svolítið á okkur seinni part fyrri hálfleiks. Mér leið ágætlega í hálfleik.

Stemningin var búin að vera með okkur í seinni hálfleik. Mér fannst lítið að frétta hjá þeim. Það var alls ekkert ósanngjarnt að við skyldum jafna. Þá vill maður auðvitað ná í sigurmarkið. En dómaratríóið sló þetta úr höndunum á okkur með að reka mann út af hjá okkur og gefa þeim dauðafæri.“

„Þetta er bara þvæla“
Brynjar Gautur fékk seinna gula spjald sitt eftir brot á miðjum velli, hann fékk þó ekki rauða spjaldið strax. Dómarar leiksins beittu hagnaðarreglunni og Víkingar keyrðu að marki Þróttar. Um leið og Brynjar hafði aftur áhrif á leikinn (sem gerðist við vítateig Víkings) þá flautaði Vilhjálmur Alvar, dómari leiksins, rak hann af velli og dæmdi aukaspyrnu á stórhættulegum stað sem Víkingur skoraði svo upp úr.

„Ef þetta eru lög þá þarf að óska eftir lagabreytingu. Ég hef aldrei nokkurn tímann áður séð þetta. Að leikmaður sem er mögulega að fá sitt seinna gula spjald og að leikurinn sé stoppaður við vítateigslínu hjá mér til þess að reka hann út af á meðan boltinn er í leik. Dómarinn hefur tjáð mér að þetta sé einhvers konar regla.

Hvað á þessi maður að gera þegar hann er búinn að fá gult og brýtur aftur af sér. Hann veit ekkert að hann sé að fá annað gult spjald, hann er ekkert viss um það. Á hann að labba út af vellinum? Hann er rekinn út af fyrir að hafa áhrif á leikinn af því að hann er mögulega að fá annað gult spjald. Þetta er bara þvæla.“

Viðtalið má sjá í heild sinni í spilaranum hér að ofan.