Leikmenn Union Berlin í launalaust frí

Union Berlin getur ekki haldið sér á floti án fótboltaleikja og hafa allir leikmenn aðalliðsins samþykkt að fara í launalaust frí til að bjarga félaginu.

Aðrir starfsmenn félagsins hafa skrifað undir nýja skammtímasamninga og tekið á sig verulegar launalækkanir.

Ólíklegt er að þetta ástand þurfi að halda lengi áfram en þýsk knattspyrnuyfirvöld, í samstarfi við Meistaradeildarfélög þýska boltans, munu dæla 65 milljónum evra til að halda smærri félögum sem eiga í fjárhagsvandræðum á floti.

Union Berlin er nýliði í efstu deild og situr í ellefta sæti sem stendur, sjö stigum frá Evrópusæti og átta stigum fyrir ofan fallsvæðið.