England: Eze sendi Arsenal á toppinn á ný

Heimamenn í Arsenal hófu leikinn af krafti og strax á 9.mínútu leiksins kom Eberechi Eze þeim yfir með góðu marki eftir frábærlega útfærða hornspyrnu.

Eftir að hornið var tekið stutt barst boltinn á Kai Havertz sem lagði boltann út á Eze sem var staðsettur á vítateigslínunni. Eze tók skotið viðstöðulaust með hægri fæti og sveigði boltann af miklu öryggi upp í fjærhornið.

Á 34. mínútu leiksins varð Arsenal fyrir áfalli er Kai Havertz þurfti að fara meiddur af velli. Hann virtist togna í nára eða aftan í læri og kom Viktor Gyökeres inn á í hans stað.

Á 75. mínútu leiksins fékk Newcastle gullið tækifæri til þess að jafna. Varamaðurinn Yoane Wissa fór þá illa að ráði sínu er hann skaut yfir markið af nokkuð stuttu færi eftir sendingu frá Nick Woltemade.

Fleiri mörk voru ekki skoruð á Emirates og tyllir Arsenal því sér á toppinn um stund með 73 stig en Manchester City fylgir fast á eftir með 70 og á auk þess leik til góða.