Harry Maguire, fyrirliði Manchester United, var afar ánægður með 6-0 sigurinn á Tranmere Rovers í enska bikarnum í dag en hann segir að liðið hafi náð að venjast vallaraðstæðum.
Maguire skoraði og lagði upp í leiknum en leikurinn fór fram á Prenton Park, heimavelli Tranmere. Völlurinn er í afar slæmu ástandi en það kom þó ekki að sök hjá lærisveinum Ole Gunnar Solskjær.
United átti ekki í vandræðum með Tranmere og komust sex leikmenn á blað. Anthony Martial, Diogo Dalot, Jesse Lingard, Phil Jones og Mason Greenwood skoruðu einnig.
„Það var mikilvægt fyrir okkur að vinna þennan leik eftir að hafa spilað illa í tapi gegn Burnley. Við ætluðum að ná góðri frammistöðu fyrir stuðningsmennina og nú erum við komnir áfram í næstu umferð og það er nákvæmlega það sem við ætluðum okkur," sagði Maguire.
„Ég hef beðið lengi eftir þessu. Ég hef fengið nokkur tækifæri til að koma boltanum í netið en það er notalegt að geta hjálpað liðinu loksins í næstu umferð. Þetta var erfitt í dag en það var þannig fyrir bæði lið. Við náðum samt að venjast þessu og þurftum bara að halda boltanum niðri," sagði hann í lokin.
Athugasemdir