Ítalía: Markalaust í Mílanó - Mark dæmt af og David brjálaður að fá ekki víti

AC Milan og Juventus gerðu markalaust jafntefli í 34. umferð Seríu A í Mílanó á Ítalíu í kvöld.

Mílanó-menn sköpuðu sér betri færi í byrjun leiksins. Youssouf Fofana átti skot sem hafnaði í hliðarnetinu og þá varði Michele Di Gregorio frábærlega frá Adrien Rabiot áður en Rafael Leao þrumaði boltanum yfir.

Juventus svaraði og var Francisco Conceicao þeirra hættulegasti maður, en hann átti frábæran sprett inn í teiginn á 35. mínútu áður en hann sendi boltann fyrir markið og á Khephren Thuram sem skoraði, en markið var réttilega dæmt af vegna rangstöðu.

Conceicao hélt áfram að ógna á hægri vængnum, en aðeins nokkrum mínútum síðar keyrði hann framhjá varnarmanni og hamraði boltanum á markið, en Mike Maignan varði vel.

Milan byrjaði seinni hálfleikinn eins og þann fyrri, með góðu tækifæri er Alexis Saelemakers fékk boltann í teignum en setti hann í þverslá. Algert dauðafæri.

Umdeilt atvik kom upp eftir rúmar fimmtíu mínútur er kanadíski sóknarmaðurinn Jonathan David geystist fram völlinn og fór fram hjá hverjum varnarmanninum á fætur öðrum áður en hann féll í teignum. Mattia Gabbia virtist ýta við honum þannig David missti jafnvægi, en ekkert var dæmt.

Liðunum var fyrirmunað að skora í þessum leik og enduðu leikar 0-0. Milan, sem var lengi vel í titilbaráttu, er í 3. sæti með 67 stig á meðan Juventus er í 4. sæti með 64 stig.