Leikmenn Schalke hafa samþykkt að taka á sig launalækkun til að hjálpa við að halda félaginu á floti í miðjum heimsfaraldri.
Schalke er þriðja félagið í efstu deild þýska boltans sem staðfestir launalækkanir eftir Bayern München og Borussia Dortmund. Staðan hjá Union Berlin er þó enn verri, þar sem leikmenn eru hreinlega komnir í launalaust frí.
„Því miður þá hefur kórónaveiran áhrif á okkur öll. Þess vegna er mikilvægt að hjálpast að á þessum erfiðu tímum og það er nákvæmlega það sem við gerum hér hjá FC Schalke 04. Við sögðum leikmönnum frá fjárhagsstöðunni og þeir voru snöggir að samþykkja að taka á sig launalækkun," segir Jochen Schneider, yfirmaður íþróttamála hjá Schalke.
Ekki er greint frá því hversu mikil skerðingin verður. Leikmenn FC Bayern eru sagðir taka 20% launalækkun.
Schalke staðfesti þá á sama tíma þátttöku í FIFA móti þar sem 26 félög úr tveimur efstu deildum Þýskalands mæta til leiks.
Athugasemdir