Spá Fótbolta.net fyrir Bestu deildina: 6. sæti

Spáin:
1. ?
2. ?
3. ?
4. ?
5. ?
6. Valur, 88 stig
7. KA, 74 stig
8. Fram, 67 stig
9. FH, 46 stig
10. Þór, 36 stig
11. ÍBV, 22 stig
12. Keflavík, 17 stig

Um liðið: Það gekk alveg nokkuð mikið á hjá Valsmönnum á síðasta tímabili þrátt fyrir að liðið hafi endað í öðru sæti og náð þannig að komast í Evrópukeppni. Fyrir tímabilið var Gylfi Þór Sigurðsson seldur til Víkinga og það litaði mikið umræðuna fyrir tímabilið. Svo þegar leið á tímabilið þá varð rosalega hávær umræða um að Srdjan Tufegdzic, Túfa, yrði ekki áfram þjálfari liðsins. Tímabilið var nokkuð flott framan af hjá Valsmönnum en eftir bikarúrsitaleikinn, þar sem þeirra besti maður Patrick Pedersen meiddist illa, þá fór allt einhvern veginn í skrúfuna. Liðið missti af Víkingum fram úr sér og að lokum varð titilbaráttan ekki mikið spennandi. Eftir tímabilið réðust Valsmenn í breytingar, bæði innan sem utan vallar. Núna á að yngja upp og horfa til framtíðar á Hlíðarenda.

Þjálfarinn: Hermann Hreiðarsson tók við sem þjálfari Vals af Túfa eftir síðasta tímabil. Það er komið alveg nýtt teymi á Hlíðarenda því Chris Brazell verður aðstoðarþjálfari og svo er Gareth Owen orðinn markvarðarþjálfari. Sumir hafa talað um breska innrás á bak við tjöldin hjá Val. Hermann kemur til Vals frá HK þar sem hann hafði verið í eitt ár. Hann endaði með HK í 4. sæti Lengjudeildarinnar, komst í úrslitaleik umspilsins um sæti í Bestu deildinni en þar tapaði liðið gegn Keflavík. Hermann er fyrrum landsliðs- og atvinnumaður sem hefur einnig stýrt ÍBV, karla- og kvennaliði Fylkis, Þrótti Vogum, verið aðstoðarmaður Sol Campbell hjá Southend og aðstoðarmaður David James hjá Kerala Blasters á sínum þjálfaraferli. Þetta er klárlega hans stærsta þjálfarastarf til þessa og verður fróðlegt að sjá hvernig honum vegnar í því.

Styrkleikar: Það hefur ekkert breyst að leikmannahópur Vals er gríðarlega vel mannaður. Tryggvi Hrafn Haraldsson og Jónatan Ingi Jónsson eru tveir af bestu framherjum deildarinnar og þeir verða að taka enn stærra hlutverk á komandi tímabili. Þeir eru með einstaklingsgæði sem geta gert út um leiki. Svo eru þeir með besta markvörð deildarinnar í Frederik Schram en hann er markvörður sem ætti að geta unnið stig fyrir þá. Það hefur verið einkennismerki Hemma Hreiðars undanfarin ár að hann hefur náð upp mikilli stemningu í sínum liðum og það er eitthvað sem manni finnst hafa vantað hjá Val síðustu misseri. Það er vonandi fyrir Valsmenn að góð stemning og góður andi verði einkennismerki þeirra á komandi keppnistímabili.

Veikleikar: Patrick Pedersen, besti striker deildarinnar, er meiddur framan af móti og mun ekkert spila fyrstu mánuði þess. Það er högg fyrir Valsmenn og þó þeir séu með frábæra kantmenn, þá vantar þeim níu á meðan Patrick er meiddur. Þeir eru með unga stráka sem hafa ekkert sýnt í þessari deild í þeirri stöðu og það verður mikil ábyrgð lögð á herðar þeirra í upphafi móts. Valur hefur reynt að fá Kristófer Inga Kristinsson frá Breiðabliki en án árangurs. Undirbúningstímabilið hefur ekki verið neitt stórkostlegt hjá Valsmönnum og það er erfitt að ráða í það hvernig þeir munu mæta inn í mótið. Það er erfitt að færa rök fyrir því að leikmannahópurinn sé sterkari en hann var á síðasta tímabili en lítið hefur verið að frétta á markaðnum hjá Valsmönnum. Þeir eru til dæmis þunnskipaðir á miðsvæðinu. Valur ætlar að spila með þriggja hafsenta kerfi en fyrirfram man maður ekki eftir mörgum liðum í toppbaráttu á Íslandi sem hafa spilað það kerfi reglulega.

Lykilmenn: Frederik Schram og Patrick Pedersen
Eins og áður segir er Frederik Schram besti markvörður deildarinnar, hann var valinn það þegar síðasta tímabil var að klárast. Þegar hann er upp á sitt besta þá er hann markvörður sem getur unnið stig fyrir liðið. Patrick er sömuleiðis besta nía deildarinnar en hann hefði líklega bætt markametið ef hann hefði haldist heill. Svo er alveg hægt að færa rök fyrir því að Valur hefði getað orðið Íslandsmeistari ef hann hefði ekki meiðst. Ef og hefði, og allt það. Það er mikilvægt fyrir Val að danska markamaskínan snúi aftur á völlinn sem fyrst.

Gaman að fylgjast með: Dagur Orri Garðarsson
Á meðan Patrick er meiddur þá gæti Dagur Orri fengið tækifæri til að spila sem fremsti maður. Hemmi Hreiðars þekkir Dag Orra vel eftir að hann var með hann í HK á síðasta tímabili. Þar skoraði Dagur 12 mörk í 24 leikjum í Lengjudeildinni. Hann er sonur Garðars Jóhannssonar og er með framherjagengin í sér. Hann er núna að fara að stíga sín fyrstu skref í Bestu deildinni.

Spurningarnar: Hver skorar mörkin í fjarveru Patrick? Hvernig gengur hjá Hemma og Brazell? Hvaða ungu leikmenn munu grípa tækifærið?

Völlurinn: Það hafa margir titlar farið á loft að Hlíðarenda síðustu árin, bæði í karla- og kvennaboltanum og í öllum íþróttum. Það hefur þó aðeins verið að minnka. Þarna er góð stúka á fótboltavellinum og gaman að kíkja í Fjósið að fá sér einn drykk. Stemningin á Hlíðarenda gæti oft verið meiri en kannski mun hún koma ef árangurinn verður góður.

Komnir:
Ingimar Torbjörnsson Stöle frá KA
Dagur Orri Garðarsson frá HK
Kristófer Dagur Arnarsson frá Fjölni
Þórður Sveinn Einarsson frá Gróttu (var á láni)

Farnir:
Aron Jóhannsson
Sigurður Egill Lárusson í Þrótt R.
Daði Kárason í Víking Ó. (var á láni hjá Selfossi)
Marius Lundemo til Noregs
Stefán Gísli Stefánsson í Njarðvík á láni
Sveinn Sigurður Jóhannesson í Stjörnuna



Leikmannalisti:
1. Ögmundur Kristinsson (m)
18. Frederik Schram (m)
3. Hörður Ingi Gunnarsson
4. Markus Lund Nakkim
5. Birkir Heimisson
6. Bjarni Mark Antonsson
7. Ingimar Torbjörnsson Stöle
8. Jónatan Ingi Jónsson
9. Patrick Pedersen
10. Kristinn Freyr Sigurðsson
12. Tryggvi Hrafn Haraldsson
13. Kristján Oddur Kristjánsson
14. Albin Skoglund
15. Hólmar Örn Eyjólfsson
17. Lukas Logi Heimisson
20. Orri Sigurður Ómarsson
21. Jakob Franz Pálsson
24. Flóki Skjaldarson
25. Stefán Þór Ágústsson (m)
26. Emil Nönnu Sigurbjörnsson
30. Matthías Kjeld
33. Andi Hoti
45. Þórður Sveinn Einarsson
66. Ólafur Flóki Stephensen
97. Birkir Jakob Jónsson
Dagur Orri Garðarsson
Kristófer Dagur Arnarsson

Fyrstu fimm leikir Vals:
12. apríl, Valur - Þór (N1 völlurinn Hlíðarenda)
17. apríl, Valur - ÍBV (N1 völlurinn Hlíðarenda)
22. apríl, FH - Valur (Kaplakrikavöllur)
27. apríl, Stjarnan - Valur (Samsungvöllurinn)
2. maí, Valur - KR (N1 völlurinn Hlíðarenda)

Spámennirnir: Anton Freyr Jónsson, Elvar Geir Magnússon, Guðmundur Aðalsteinn Ásgeirsson, Haraldur Örn Haraldsson, Jóhann Þór Hólmgrímsson, Kári Snorrason, Stefán Marteinn Ólafsson, Sverrir Örn Einarsson, Sæbjörn Þór Þórbergsson Steinke, Sölvi Haraldsson, Tómas Þór Þórðarson og Valur Gunnarsson.