Þremur leikjum er lokið í Pepsi Max-deild karla þennan sunnudaginn. KR tapaði gegn Fylki, FH vann gegn fjölni og þá skildu ÍA og Víkingur jöfn.

Í Vesturbænum kom Orri Hrafn Kjartansson Fylki yfir þegar hann skoraði sitt fyrsta mark í fyrri hálfleik. Varamaðurinn Óskar Örn Hauksson jafnaði leikinn fyrir KR snemma í seinni hálfleik. Á 59. mínútu fékk Ragnar Bragi Sveinsson að líta rauða spjaldið í liði Fylkis.

KR tókst ekki að bæta við marki en á 95. mínútu leiksins fékk Beitir Ólafsson rauða spjaldið og víti dæmt á KR. Beitir kastaði boltanum út og fór svo með hendina í andlit Ólafs Inga Skúlasonar sem stóð fyrir aftan Beiti. Vítaspyrna var dæmd!

Guðjón Orri Sigurjónsson kom inn á hjá KR fyrir Stefán Árna Geirsson. Gaui var nálægt því að verja spyrnu Sam Hewson en inn fór boltinn - þvílík dramatík í Fylkissigri.

Í Hafnarfirði skoraði varamaðurinn Morten Beck eina markið eftir hornspyrnu. „Logi með innsnúning í markteiginn þar sem boltinn hrekkur af annað hvort Morten eða varnarmanni. Þarfnast endursýningar...en aðalmálið er að FH er komið yfir!" skrifaði Magnús Þór Jónssón í beinni textalýsingu frá Kaplakrikavelli.

Mesta markafjörið var á Akranesvelli þar sem bæði ÍA og Víkingur R. skoruðu tvö mörk. Tryggvi Hrafn Haraldsson skoraði tvö mörk fyrir heimamenn og þeir Ágúst Eðvald Hlynsson og Halldór Jón Sigurður Þórðarson skoruðu fyrir Víking. ÍA er vant því að leika markaleiki, liðið hefur skorað 39 mörk og fengið á sig 39 mörk.