Tíu stærstu samningslausu bitarnir

Emil Atlason: Er með samningstilboð frá Stjörnunni en ólíklegt að hann haldi kyrru fyrir. Víkingur, Fram og KR, efstu þrjú lið deildarinnar, eru á eftir Emil.

Kristófer Ingi Kristinsson: Valsmenn hafa eins og áður mikinn áhuga á Kristófer og þá vilja Blikar halda honum. Hann er með tengingu á Hlíðarenda þar sem faðir hans er í stjórn en Kristófer vill sjálfur halda aftur út í atvinnumennsku.

Stefan Alexander Ljubicic: Er með samningstilboð frá Keflvíkingum á borðinu en hann mun að öllum líkindum yfirgefa félagið. Víkingur, Stjarnan og FH eru öll áhugasöm um þennan stæðilega sóknarmann en hann vill reyna aftur fyrir sér erlendis.

Sveinn Aron Guðjohnsen: Skrifaði undir hálfs árs samning við Íslandsmeistarana. Hann stefnir að fara aftur út í atvinnumennsku en gæti verið mögulegur kostur fyrir lið í framherjaleit. Liðsfélagi hans hjá Víkingi, Aron Elís Þrándarson, er skráður með lausan samning á KSÍ en samkvæmt Víkingi rennur samningurinn út á næsta ári. Það væri þó hæpið að sjá hann fara frá uppeldisfélaginu og því kemst hann ekki á lista.

Kristinn Steindórsson: Yfirgefur Blika hafandi unnið allt sem hægt er að vinna með félaginu. Hann hefur verið orðaður m.a. við Val, HK og Fylki.

Guðmundur Tyrfingsson: Átti frábært tímabil í Árbænum þar sem hann skoraði 15 mörk í 22 leikjum í Lengjudeildinni. FH hefur verið orðað við þennan 23 ára sóknarmann.

Adam Ægir Pálsson: Yfirgaf Val í sumar og skrifaði undir hálfs árs samning við KA. Var manna sprækastur fram á við á annars erfiðu tímabili Norðanmanna.

Kristinn Jónsson: Þessi þaulreyndi bakvörður var í takmörkuðu hlutverki hjá Breiðabliki í sumar en eflaust flestir sem vita yfir hvers konar gæðum hann býr yfir. Orðinn 36 ára en hefur ekki gefið út að hann ætli að hætta.

Sigurður Arnar Magnússon: Eyjamaðurinn er fluttur í bæinn og hefur Valur sett sig í samband við hann.

Markus Lund Nakkim: Þessi þrítugi Norðmaður er á radarnum hjá bæði Íslandsmeisturum Víkings og Skagamönnum.