England: Ben Mee tryggði Burnley stigin

Meiðslahrjáð lið Crystal Palace og Burnley mættust í eina leik dagsins í ensku úrvalsdeildinni og var staðan markalaus eftir afar bragðdaufan fyrri hálfleik.

Seinni hálfleikur var ekki mikið skárri en Ben Mee, varnarmaður Burnley, náði að skalla knöttinn í netið á 62. mínútu eftir aukaspyrnu frá Ashley Westwood.

Heimamenn lifnuðu aðeins við eftir markið en náðu ekki að koma inn jöfnunarmarki.

Afar dýrmæt stig í hús fyrir Burnley en þetta var annar sigur liðsins í röð. Burnley er aðeins sjö stigum frá Evrópusæti sem stendur.

Burnley endaði þar með frábært gengi Crystal Palace sem var búið að vinna fjóra deildarleiki í röð án þess að fá mark á sig fyrir leik dagsins.

Jóhann Berg Guðmundsson var ekki í hópi Burnley vegna meiðsla.