Langþráður og sannfærandi sigur í Lúxemborg

Íslenska karlalandsliðið vann sanngjarnan 3-0 sigur á Lúxemborg í 2. umferð C-deildar Þjóðadeildarinnar á Stade de Luxembourg í kvöld.

Eftir vonbrigðin gegn Eistlandi á Laugardalsvelli mætti liðið mun ákafari til leiks og frammistaðan í fyrri hálfleik var frábær.

Andri Lucas Guðjohnsen kom Íslandi á bragðið á 13. mínútu. Orri Steinn Óskarsson hristi af sér varnarmann hægra megin, keyrði upp vænginn og fann Andra inni í teignum sem setti boltann utanfótar framhjá markverðinum og í netið.

Þetta var tólfta landsliðsmark Andra sem er nú aðeins tveimur mörkum frá því að jafna afa sinn, Arnór Guðjohnsen.

Íslenska liðið vann boltann hátt uppi á vellinum og nýtti sér það vel.

Þegar um sex mínútur voru eftir af venjulegum leiktíma í fyrri hálfleik skoraði Orri annað markið. Ísak Bergmann Jóhannesson skallaði boltann á Andra við miðsvæðið sem tók frábæra hælsendingu á lofti yfir vörnina og á Orra. Hann tók boltann fullkomlega niður fyrir sig, keyrði upp að marki og skoraði.

Þetta var tíunda landsliðsmark Orra og samstarf hans og Andra var frábært.

Staðan var 2-0 í hálfleik, en krafturinn var ekki alveg sá sami í þeim síðari.

Heimamenn reyndu að koma sér aftur inn í leikinn en án árangurs og Ísland náði síðan að drepa leikinn endanlega.

Gylfi Þór Sigurðsson tók hornspyrnu um tuttugu mínútum fyrir leikslok sem rataði beint á kollinn á Guðlaugi Victori Pálssyni og hann stangaði boltann í netið. Sjötta landsliðsmark hans og sigurinn þar með gulltryggður.

Fagmannleg frammistaða hjá Íslandi sem er komið á topp D-riðils C-deildarinnar með fjögur stig, einu meira en Lúxemborg sem er í öðru sæti. Eistland er í 3. sæti með tvö stig eftir markalaust jafntefli við Búlgaríu sem er á botninum með eitt stig.