| þri 30.apr 2024 12:00 Mynd: Fótbolti.net - Sævar Geir Sigurjónsson |
|
Spá þjálfara í 2. deild 7. sæti
Fótbolti.net kynnir liðin sem leika í 2. deild í sumar eitt af öðru eftir því hvar þeim er spáð. Við fengum alla þjálfara liðanna í deildinni til að spá fyrir sumarið og fengu liðin því stig frá 1-11 eftir því en ekki var hægt að spá fyrir sínu eigin liði. Hetti/Hugin er spáð sjöunda sæti deildarinnar.
Hetti/Hugin er spáð sjöunda sæti 2. deildar í sumar.
Brynjar Árnason (hér til vinstri) hefur gert frábærlega sem þjálfari liðsins.
Kristófer Einarsson, hér í baráttunni gegn Dalvík/Reyni, er mikilvægur fyrir Hött/Hugin.
Rafa Llop er spennandi leikmaður sem gekk í raðir Hattar/Hugins í vetur.
Víðir Freyr Ívarsson er bara tvítugur en kemur samt til með að fá gott hlutverk í liðinu.
1.
2.
3.
4.
5.
6.
7. Höttur/Huginn, 56 stig
8. KFG, 54 stig
9. Völsungur, 37 stig
10. Reynir S., 35 stig
11. KF, 27 stig
12. Kormákur/Hvöt, 13 stig
7. Höttur/Huginn
Hetti/Hugin var spáð sjötta sæti í fyrra og þar enduðu þeir að lokum. Haukar voru eins mikið miðlungslið og hægt var í fyrra með níu sigra, fjögur jafntefli, níu töp og núll í markatölu en Höttur/Huginn var ekki langt frá því - voru aðeins betri. Það er ekki sérlega langt síðan Höttur/Huginn var á barmi þess að falla niður í 4. deild en liðið hefur núna gert vel í því að festa sig í sessi í 2. deild, og er félagið klárlega að stefna hærra en spáin segir til um. Það er mikil ástríða fyrir austan og mikið lagt í að gera hlutina vel. Ef allt gengur upp, þá gæti Höttur/Huginn klárlega orðið spútniklið í ár og blandað sér í baráttuna um að komast upp.
Þjálfarinn: Brynjar Árnason stýrir Hetti/Hugin áfram en hann hefur gert afskaplega flotta hluti með liðið frá því hann tók vð árið 2021. Brynjar er bara 34 ára gamall og á svo sannarlega framtíðina fyrir sér í þjálfun. Hann var þjálfari ársins í 2. deild sumarið 2022 þegar Höttur/Huginn endaði í fimmta sæti eftir að hafa komið upp sem nýliðar. Hann á stóran þátt í því að liðið er á góðum stað í dag.
Stóra spurningin: Þreyttir á miðjumoðinu?
Eins og áður segir þá var Höttur/Huginn ekki langt frá því að falla niður í 4. deild árið 2020, en þeir upp ári seinna og hafa verið í 2. deild síðustu tvö tímabil. Þessi tvö tímabil í 2. deild hafa farið í eins konar miðjumoð og það er spurning hvort menn hjá félaginu séu ekki orðnir þreyttir á því. Er ekki kominn tími á að taka þátt í baráttunni um að fara upp?
Lykilmenn:
Kristófer Einarsson: Fyrirliðinn spilaði hverja einustu mínútu fyrir Hött/Hugin í 2. deild í fyrra. Hjartað í liðinu og afar mikilvægt púsl ef það á að ganga vel í sumar.
Rafael Llop Caballe: Spænskur miðjumaður sem gekk til liðs við félagið í vetur. „Rafa minnir margt á Ion (Perello) sem lék með liðinu fyrir nokkru síðan, bæði skapandi og teknískur, með gæði og fleira," sagði í tilkynningu Hattar/Hugins þegar Rafa, eins og hann er kallaður, var tilkynntur. Ef hann kemur inn með svipuð gæði og Ion, þá er þetta ansi góð styrking.
Víðir Freyr Ívarsson: Tvítugur sóknarmaður sem er á láni frá Fram en hann þekkir Hött/Hugin vel enda uppalinn þar. Stór og stæðilegur sóknarmaður sem kemur til með að taka að sér enn stærra hlutverk í liði Hattar/Hugins í sumar.
Komnir:
Árni Veigar Árnason frá KA (á láni)
Edmilson Domingos De Lima Viegas frá Portúgal
Genis Arrastraria Caballe frá Spáni
Hjörvar Sigurgeirsson frá Aftureldingu
Ívar Arnbro Þórhallsson frá KA (á láni)
Martim Fortuna Soares Sequeira Cardoso frá Portúgal
Rafael Llop Caballe frá Spáni
Víðir Freyr Ívarsson frá Fram (á láni)
Farnir:
Alberto Lopez Medel til Spánar
Brynjar Þorri Magnússon í KFK
Daniel Arnaud Ndi í Víking Ó.
Eiður Orri Ragnarsson í KFA (var á láni frá Njarðvík)
Hjörvar Daði Arnarsson í ÍBV (var á láni frá HK)
Matheus Bettio Gotler í KFA
Þjálfarinn segir - Brynjar Árnason
„Já, spáin kemur mér ekki á óvart þar sem við höfum verið um miðja deild síðustu tvö ár. Deildin verður sterk í ár og eins og oftast eru mörg lið sem ætla sér stóra hluti. Ég held að deildin verði bara mjög spennandi og skemmtileg og við getum ekki beðið eftir að byrja. Hópurinn okkar hefur tekið töluverðum breytingum frá því í fyrra en við erum mjög ánægðir með hvernig hann lítur út og strákarnir eru búnir að æfa vel og eru hungraðir. Nýju erlendu leikmennirnir líta einnig vel út og hafa fallið vel inn í hópinn þannig að við förum bara brattir inn í sumarið."
Fyrstu þrír leikir Hattar/Hugins:
4. maí, Haukar - Höttur/Huginn (BIRTU völlurinn)
11. maí, Þróttur V. - Höttur/Huginn (Vogaídýfuvöllur)
18. maí, Höttur/Huginn - KFG (Fellavöllur)
Athugasemdir
