Spá þjálfara og fyrirliða fyrir Lengjudeild kvenna: 5. sæti

Spáin:
1.
2.
3.
4.
5. Fylkir, 95 stig
6. HK, 84 stig
7. Grindavík/Njarðvík, 66 stig
8. KR, 62 stig
9. Haukar, 61 stig
10. Afturelding, 26 stig

5. Fylkir
Fylkiskonur eru aftur mættar í Lengjudeildina eftir að hafa stoppað stutt í Bestu deild kvenna. Fylkir fór upp úr Lengjudeildinni ásamt Víkingi sumarið 2023 en gengi þessara tveggja liða var mjög mismunandi í fyrra. Fylkir var með 13 stig þegar deildin skiptist og í næst neðsta sæti. Það gekk svo sannarlega ekki vel eftir skiptinguna og náði Fylkir ekki í eitt stig í síðustu þremur leikjunum. Árbæjarfélagið féll og verður núna með báða sína meistaraflokka í Lengjudeildunum þetta sumarið. Því er ekki spáð að Fylkir fari beint aftur upp, þær verði um miðja deild og það verður áhugavert að sjá hvort það verði niðurstaðan í sumar.

Þjálfarinn: Bjarni Þórður Halldórsson tók við þjálfun Fylkis í vetur eftir að félagið tók ákvörðun um að Gunnar Magnús Jónsson yrði ekki áfram með liðið. Bjarni Þórður er fæddur 1983 og lék yfir 100 leiki með Fylki í efstu deild karla á ferli sínum sem markvörður. Hann hefur komið náið að þjálfun hjá Fylki á síðustu árum og starfaði síðast sem markmannsþjálfari meistaraflokks kvenna. Hann er núna að fara inn í sitt fyrsta aðalþjálfarastarf.

Stóra spurningin: Hvernig díla þær við brotthvarf lykilmanna?
Fylkir missti stóra pósta úr liðinu í vetur. Eva Rut Ásþórsdóttir, sem var fyrirliði, fór norður og Tinna Brá, sem hefur varið mark liðsins í þónokkur ár, fór í Val. Guðrún Karítas Sigurðardóttir á þá von á barni. Þetta voru algjörir lykilmenn og það verður áhugavert að sjá hvernig Fylkisliðið nær að díla við brotthvarf þessara lykilmanna. Ungir leikmenn eiga að taka við keflinu og það gæti tekið smá tíma fyrir þær að venjast þessari ábyrgð.

Lykilmenn: Signý Lára Bjarnadóttir og Helga Guðrún Kristinsdóttir
Signý Lára er orðin fyrirliði eftir að Eva Rut yfirgaf Fylkisliðið. Hún hefur verið mjög öflugur leikmaður í vörn Fylkis síðustu árin og þarf að eiga mjög gott sumar núna. Leikmaður sem hefur spilað alla leiki Fylkis síðustu árin og er mjög svo mikilvægur leikmaður fyrir Árbæjarfélagið. Helga Guðrún er þá í stóru hlutverki á hinum enda vallarins en hún var frábær síðast þegar Fylkir lék í Lengjudeildinni. Hún var einnig í fínum gír í Bestu deildinni síðasta sumar og ætti að geta verið einn besti leikmaður deildarinnar á sínum degi.

Gaman að fylgjast með: Ásdís Þóra Böðvarsdóttir
Ásdís Þóra er efnilegur varnarmaður sem gekk í raðir Fylkis frá Selfossi núna í vetur. Hún var í stóru hlutverki hjá Selfossi síðasta sumar þar sem hún kom við sögu í 23 leikjum. Hún hefur spilað gott hlutverk með Fylki á undirbúningstímabilinu og er spennandi leikmaður fyrir Árbæjarfélagið. Hefur á þessu ári spilað tvo leiki með U19 landsliðinu.

Komnar:
Ásdís Þóra Böðvarsdóttir frá Selfossi
Bergljót Júlíana Kristinsdóttir frá KR
Birna Kristín Eiríksdóttir frá Fram (Var á láni)
Embla Katrín Oddsteinsdóttir frá Selfossi
Emma Björt Arnarsdóttir frá FH (Á láni)
Eva Stefánsdóttir frá Val (Á láni)
Guðrún Þóra Geirsdóttir frá Selfossi
Harpa Karen Antonsdóttir frá Aftureldingu
Hildur Anna Brynjarsdóttir frá Völsungi
Katrín Ásta Eyþórsdóttir frá Fram (Á láni)
Laufey Björnsdóttir frá HK
Sara Rún Antonsdóttir frá Augnabliki (Á láni)

Farnar:
Amelía Rún Fjeldsted í Keflavík
Elfa Karen Magnúsdóttir í Keflavík
Emma Sól Aradóttir í HK (Var á láni)
Eva Rut Ásþórsdóttir í Þór/KA
Íris Una Þórðardóttir í FH (Var á láni frá Þrótti R.)
Klara Mist Karlsdóttir í Þrótt R.
Mist Funadóttir í Þrótt R.
Tinna Brá Magnúsdóttir í Val

Munum að sjálfsögðu reyna að enda ofar
Bjarni Þórður, þjálfari Fylkismanna, segir að spáin komi ekki sérlega mikið á óvart.

„Bara fínasta spá sem kemur ekkert sérstaklega á óvart. Miklar breytingar á leikmannahóp, nýtt þjálfarateymi og ákveðin uppbygging í gangi. Við munum að sjálfsögðu reyna að enda ofar en þetta," segir Bjarni Þórður.

„Það að falla um deild voru auðvitað mikil vonbrigði fyrir félagið og svo sem ekkert meira um það að segja."

Hvernig hefur undirbúningstímabilið gengið hjá ykkur?

„Undirbúningstímabilið hefur í heildina gengið vel. Við sjáum vaxandi frammistöðu á milli mánaða og förum hóflega bjartsýn inn í sumarið."

Það eru miklar breytingar á Fylkisliðinu á milli ára; nýir leikmenn og nýr þjálfari.

„Já, það eru mjög miklar breytingar á leikmannahópnum, margir póstar sem reru á önnur mið eða eru að glíma við meiðsli. Það hefur gengið vel að fylla í skörðin og leikmennirnir sem við tókum inn hafa komið mjög sterkt inn í hópinn."

„Ég held að deildin verði hnífjöfn frá upphafi til enda, deildin er feiknasterk með mikið af hæfileikaríkum leikmönnum og góðum liðum. Okkar markmið fyrir sumarið eru að við ætlum að leggja okkur öll fram til þess að fá stöðuga frammistöðu frá viku til viku."

Eitthvað sem þú vilt bæta við að lokum?

„Sjáumst á vellinum. Áfram Fylkir!"

Fyrstu þrír leikir Fylkis:
3. maí, Fylkir - ÍA (tekk VÖLLURINN)
8. maí, Fylkir - Grindavík/Njarðvík (tekk VÖLLURINN)
17. maí, Grótta - Fylkir (Vivaldivöllurinn)