Willum Þór Willumsson var í byrjunarliði Birmingham City sem skóp þægilegan sigur á útivelli gegn Blackpool í League One deild enska boltans í dag.
Birmingham er löngu búið að vinna deildina og mun því taka þátt í Championship deildinni á næstu leiktíð.
Willum lék allan leikinn framarlega á miðjunni er Birmingham vann með tveggja marka mun, sem hefði getað verið stærri. Alfons Sampsted var ekki með í hóp.
Guðmundur Þórarinsson kom þá við sögu í óvæntu tapi FC Noah gegn Van í armenska bikarnum. Noah er langbesta liðið í Armeníu en þetta tap í dag kom ekki að sök.
Noah hafði unnið fyrri leikinn 2-0 á heimavelli og því urðu lokatölur 2-1 fyrir Noah þrátt fyrir tapið í dag.
Liðin mættust í undanúrslitum. Noah spilar við Ararat-Armenia í úrslitaleiknum.
Að lokum skoraði Brenna Lovera eina mark leiksins er Glasgow City vann nágrannaslaginn gegn Rangers í efstu deild skoska boltans.
Brenna skoraði úr vítaspyrnu á 38. mínútu og er þetta afar dýrmætur sigur fyrir Glasgow, sem klifrar uppfyrir Rangers í titilbaráttunni.
Glasgow er í öðru sæti deildarinnar, þremur stigum á eftir toppliði Hibernian.
Rangers er svo í þriðja sæti, tveimur stigum á eftir Glasgow og þar á eftir fylgja Celtic og Hearts.
Blackpool 0 - 2 Birmingham
Van 1 - 0 Noah (1-2 samanlagt)
Rangers 0 - 1 Glasgow City
0-1 Brenna Lovera ('38, víti)
Athugasemdir
