„Sigurmark í lokin gerir þetta ennþá sætara“
Fyrirliðinn Álfhildur Rósa Kjartansdóttir var hæstánægð með sigurinn í kvöld
Mynd: Fótbolti.net - Hafliði Breiðfjörð
Fyrirliðinn Álfhildur Rósa Kjartansdóttir var hæstánægð með sigurinn í kvöld
Mynd: Fótbolti.net - Hafliði Breiðfjörð
Þróttur vann dramatískan 2-1 sigur á FH á heimavelli í kvöld þar sem sigurmarkið kom seint í leiknum. Fyrirliðinn Álfhildur Rósa Kjartansdóttir var að vonum ánægð með niðurstöðuna.
„Bara ótrúlega glöð, ánægð með sigurinn. Við þurftum þvílíkt að berjast fyrir þessu og að fá svona sigurmark í lokin bara gerir þetta ennþá sætara.“
Þróttur lenti undir í leiknum en Álfhildur segir að trúin hafi aldrei horfið.
„Já alltaf finnst mér. Það er rosalega góður liðsandi í liðinu. Við stöndum alltaf saman og berjumst þar til á lokasekúndu.“
„Fyrri hálfleikurinn var kannski ekkert sérstakur hjá okkur þannig við bara töluðum saman inn í klefa og ætluðum að standa okkur betur og mér fannst við gera það.“
Álfhildur segir liðið hafa lært af síðasta leik.
„Við vitum alveg hvað við erum góðar í og gerum það mjög vel. Það var kannski pínu stress í Blikaleiknum. Vorum að fara svolítið út fyrir það sem við kunnum, gerum og erum góðar í.“
Hún var ekki í vafa um tilfinninguna þegar sigurmarkið kom.
„Þetta er bara alltaf einhvern veginn ólýsandi tilfinning og að vinna fótboltaleiki bara. Þess vegna er maður í þessu. Þetta er ógeðslega gaman og sérstaklega svona mark einhvern veginn í lokin bara geggjuð tilfinning.“
FH-liðið reyndist erfitt viðureignar í kvöld.
„Bara erfitt, mjög erfiður leikur og þær eru ógeðslega góðar í fótbolta. Alltaf einhvern veginn mikil barátta og já við þurftum að vinna fyrir þessu.“
