Besta deild kvenna: Dramatískur sigur í Reykjanesbæ

Grindavík/Njarðvík tók á móti Þór/KA í fyrri leik dagsins í Bestu deild kvenna. Þar mættust sameinuð félög í spennandi slag í 2. umferð tímabilsins.

Akureyringar náðu forystunni snemma leiks þegar Margrét Árnadóttir slapp innfyrir vörnina og lagði boltann á Erin Flurey sem kláraði af stuttu færi.

Það var nokkuð jafnræði með liðunum í fyrri hálfleik þar sem þau skiptust á að sækja og fengu bæði færi til að bæta mörkum við, en tókst ekki.

Gestirnir voru óheppnir að tvöfalda ekki forystuna í upphafi síðari hálfleiks og var refsað fyrir slaka færanýtingu þegar Natasha Moraa Anasi skoraði. Natasha skoraði eftir að stöllur hennar unnu boltann af Bríeti Jóhannsdóttur á hættulegum stað.

Þór/KA var áfram sterkara liðið en átti í erfiðleikum með að nýta þær góðu stöður og þau færi sem sköpuðust. Þess í stað refsuðu heimakonur með marki í uppbótartíma. Sigríður Emma Jónsdóttir potaði boltanum yfir marklínuna eftir atgang í kjölfar hornspyrnu.

Lokatölur urðu því 2-1 fyrir Grindavík/Njarðvík sem er með þrjú stig eftir tvær fyrstu umferðirnar. Þór/KA er með eitt stig.