Gakpo lagðist í grasið og hágrét eftir að hafa skorað

Cody Gakpo skoraði mark Hollands gegn Marokkó í útsláttarkeppni HM í nótt. Hann kom Hollendingum yfir á 72. mínútu og tilfinningarnar helltust yfir hann.

Gakpo lagðist strax í grasið og hágrét, enda hefur hann gengið í gegnum erfiða viku. Unnusta hans missti fóstur, sem hafði eðlilega mikil áhrif á þau bæði. Hann tileinkaði henni og barninu markið með því að benda til himins.

Liðsfélagar hans söfnuðust saman í kringum hann.

Gakpo, sem spilar fyrir Liverpool, bað á laugardaginn um „næði og rými" eftir að hafa misst ófæddan son sinn.

Noa van der Bij, kærasta Gakpo, tilkynnti fréttirnar. Parið átti von á sínu öðru barni saman en það var drengur sem átti að fæðast í október. Van der Bij birti mynd á samfélagsmiðlum af parinu haldast í hendur yfir teppi og prjónahúfu.

„Með sorgmæddum hjörtum deilum við þeim hörmulegu fréttum að drengurinn okkar lést á meðgöngu,“ skrifaði Van der Bij. „Þökkum ykkur fyrir ást ykkar og stuðning. Elijah Raphael Gakpo. Elskaður að eilífu. Sonur okkar að eilífu.“

Markið sem Gakpo skoraði í nótt dugði Hollendingum ekki því Marokkó jafnaði í uppbótartíma og vann viðureignina svo í vítaspyrnukeppni.