Besta deildin: Sturluð dramatík á Hlíðarenda

Valur fékk ÍA í heimsókn í mikilvægum leik í kvöld. ÍA var í 6. sæti með 26 stig fyrir leikinn og Valur gat jafnað Skagamenn að stigum með sigri og haldið í vonina að spila í efri hlutanum þegar deildin skiptist upp.

Skagamenn náðu forystunni snemma leiks. Markús Páll Ellertsson fékk nægan tíma inn á teignum og setti boltann milli fóta Frederik Schram.

Dagur Orri Garðarsson fékk gott færi til að jafna metin en Árni Marinó Einarsson varði vel frá honum. Kristófer Dagur Arnarsson slapp í gegn eftir klukkutíma leik, Árni komst í boltann og Baldvin Þór Berndsen bjargaði á síðustu stundu.

Jónatan Ingi Jónsson var síðan hársbreidd frá því að jafna metin en átti skot í stöngina.

Valsmenn náðu að jafna stuttu síðar þegar Lúkas Logi Heimisson skoraði með hörkuskoti. Jónatan Ingi kom síðan Valsmönnum yfir strax í kjölfarið með ótrúlegu marki.

Spurning hvort hann hafi ætlað að skjóta eða ekki en hann var með boltann vinstra meginn og boltinn flaug yfir Árna Marinó og hafnaði í netinu.

ÍA fékk hornspyrnu í blálokin þar sem Frederik Schram var of lengi að taka markspyrnu. Árni Marinó kom inn á teiginn og átti slakan skalla en ÍA fékk aðra hornspyrnu. Boltinn fór á Baldvin Þór sem skallaði boltann í netið og tryggði ÍA svakalega dramatískt jafntefli.

ÍA er í 6. sæti með 27 stig en Valur í 7. sæti með 24 stig fyrir lokaumferðina.