Enski varnarmaðurinn Steven Caulker hefur samið við Keciorengucu sem leikur í B-deildinni í Tyrklandi, en samningur hans gildir út tímabilið.
Caulker fór fremur óhefðbundna leið að því að finna sér nýtt félag en hann setti auglýsingu inn á samfélagsmiðilinn LinkedIn og stóðu viðbrögðin ekki á sér.
Á endanum samdi hann við Keciorengucu í B-deildinni í Tyrklandi, en þetta er sextánda félagið sem hann mun spila fyrir á ferlinum.
Hann spilaði áður með félögum á borð við Cardiff, Liverpool, Southampton og Tottenham.
Félagaskipti Caulker til Liverpool eru oft rædd sem ein furðulegustu skiptin undir stjórn Jürgen Klopp. Hann var fenginn á láni í janúar árið 2016 og var notaður sem framherji.
Varnarmaðurinn hefur þá spilað fyrir landslið Englands og Síerra Leóne. Hann skoraði í eina landsleik sínum með Englandi í 4-2 tapi gegn Svíþjóð.
Athugasemdir
