Hull City reynir við fjóra í viðbót

Stjórnendur félagsins hafa verið önnum kafnir við að styrkja leikmannahópinn undanfarnar vikur og eru nokkrir nýir leikmenn að bætast við undir lok félagaskiptagluggans.

Hull er að kaupa Tim Iroegbunam úr röðum Everton fyrir 13 milljónir punda en 10 milljónir geta bæst við upphæðina í árangurstengdar aukagreiðslur.

Iroegbunam er 23 ára miðjumaður sem kom við sögu í 29 deildarleikjum með Everton á síðustu leiktíð.

Þá er Robinio Vaz á leiðinni á lánssamningi frá Roma. Hull borgar 2 milljónir evra fyrir lánssamninginn og fylgir 30 milljón evru kaupmöguleiki með.

Hull er þar að auki búið að ná samkomulagi við Stuttgart um kaupverð fyrir þýska bakvörðinn Josha Vagnoman.

Vagnoman er 25 ára gamall og með tvo landsleiki að baki fyrir Þýskaland. Hull borgar um 7 milljónir evra til að festa kaup á bakverðinum sem kom við sögu í 40 leikjum með liðinu á síðustu leiktíð.

Hull á eftir að semja við Vagnoman um launamál en það ætti ekki að vera vandamál.

Nýliðarnir eru að lokum að reyna að kaupa Sorba Thomas frá Stoke City. Stoke er búið að gefa munnlegt samþykki fyrir kauptilboði frá Hull, ef Championship félaginu tekst að finna leikmann til að fylla í skarðið í tæka tíð.

Félagaskiptaglugginn lokar annað kvöld og gæti Stoke reynt að fá Liam Millar úr röðum Hull til að fylla í skarðið fyrir Thomas.

Stoke samþykkti 7 milljón punda tilboð með árangurstengdum aukagreiðslum upp á 3 milljónir til viðbótar.

Hull er búið að krækja í 12 leikmenn í sumar fyrir um það bil 100 milljónir punda.