Pepsi-deildin fer af stað á sunnudag en stórleikur umferðarinnar verður á mánudagskvöld þegar KR og FH eigast við í Frostaskjólinu.
„Það er tilhlökkun hjá okkur eins og þeim að byrja þetta mót loksins. Það er alltaf gaman að koma í Frostaskjólið og ég býst við hörkuleik á mánudagskvöld," segir Davíð Þór Viðarsson, fyrirliði FH.
„Menn eru að spá okkur, KR og Stjörnunni í sérflokk. Svo verður bara að sjá hvað gerist en KR er með virkilega sterkt lið og búið að bæta við sig nýjum mönnum síðustu vikurnar. Á pappírnum mjög gott lið."
„Menn hafa talað um að það sé slæmt að hafa þessa stórleiki snemma en ég held að það sé ágætt fyrir deildina. Það er ágætis auglýsing og gæti vakið athygli."
FH hefur verið þekkt fyrir að leika 4-3-3 en liðið hefur leikið 4-4-2 á undirbúningstímabilinu. Davíð var spurður að því hvernig það hafi gengið.
„Ágætlega að mestu leyti. Við höfum bæði átt góða og slæma leiki og kannski skort stöðugleika hjá okkur. Þetta er bara fótbolti og við erum með okkar færslur sama hvaða leikkerfi er spilað. Við erum með okkar hlutverk."
Mikil umræða hefur verið um sterkan leikmannahóp FH en Davíð segir að í Hafnarfirði séu menn ekkert óvanir pressunni.
„Frá 2003 erum við búnir að lenda í einu af tveimur efstu sætunum. Okkur er alltaf spáð ofarlega og við höfum staðið við það. Aðalatriðið er fyrir okkur að mæta eins og menn í þetta mót og gjöra svo vel að þessar spár muni rætast," segir Davíð en FH er spáð efsta sæti. Hér að ofan má sjá viðtalið í heild sinni.
Athugasemdir