Arsene Wenger fagnaði 400. sigurleik sínum í ensku úrvalsdeildinni þegar Arsenal vann 2-1 sigur gegn QPR í lokaleik dagsins. Alexis Sanchez átti enn einu sinni stórleik og var maðurinn bak við sigurinn.

Eftir sjö mínútna leik fékk Arsenal vítaspyrnu þegar Armand Traore braut klaufalega á Alexis Sanchez. Rob Green, markvörður QPR, varði slaka spyrnu Sanchez.

Sílemaðurinn bætti upp fyrir mistökin með því að skora með skalla eftir fyrirgjöf Kieran Gibbs og koma Arsenal yfir 1-0 en þannig var staðan í hálfleik.

Á 53. mínútu missti Arsenal Olivier Giroud af velli með rautt spjald. Frakkinn missti stjórn á skapi sínu og skallaði til Nedum Onuoha þegar boltinn var ekki í leik. Ekki telst það gáfulegt.

Tomas Rosicky þakkaði fyrir tækifærið sem hann fékk í byrjunarliðinu, sinn fyrsta byrjunarliðsleik í úrvalsdeildinni síðan í maí, með því að koma Arsenal tveimur mörkum yfir og létta pressuna. Arkitektinn var að sjálfsögðu Sanchez sem dansaði framhjá varnarmönnum QPR áður en hann renndi boltanum á Rosicky.

Mathieu Debuchy braut svo af sér innan teigst og Charlie Austin hleypti spennu í leikinn með því að minnka muninn úr vítaspyrnu. Austin þrumaði boltanum í mitt markið.

QPR átti nokkrar hættulegar sóknir í lokin en Arsenal náði að halda út og fagna naumum sigri. Arsenal er í sjötta sæti, tveimur stigum frá Meistaradeildarsæti, en QPR er í 16. sæti, tveimur stigum fyrir ofan fallsæti.