Vesen með pólska þjóðsönginn Þjóðsöngvarnir að baki. Það var hökt á pólska söngnum í kerfinu og var pólska liðið búið að syngja hann þegar lagið kláraðist í kerfinu. Enginn taktur í þessu. Íslenski söngurinn gekk talsvert betur.

Upphitun er á enda og það er verið að lesa liðin upp. Styttist heldur betur í það að leikurinn fari af stað.

Hetjan í síðasta glugga byrjar

Þrjár breytingar á byrjunarliðinu frá síðasta leik Þorsteinn gerir þrjár breytingar frá síðasta landsleik þar sem Íslands vann 2-1 endurkomusigur á Serbíu í febrúar og tryggði sér sæti í A-deild undankeppninnar.

Þær Ólöf Sigríður Kristinsdóttir og Hlín Eiríksdóttir taka sér sæti á bekknum og inn koma þær Diljá Ýr Zomers og Bryndís Arna Níelsdóttir. Bryndís skoraði sigurmarkið gegn Serbíu.

Þriðja breytingin er svo í markinu þar sem Fanney Inga Birkisdóttir kemur inn fyrir Telmu Ívarsdóttur.

Landsliðsþjálfarinn var spurður út í Bryndísi á fréttamannafundi í gær. Bryndís var markadrottning Bestu deildarinnar í fyrra og samdi við Växjö í Svíþjóð í vetur.

Hefur hún tekið stór skref síðasta árið?

,,Já, hún hefur verið að koma vel inn hjá okkur, skilað sínu vel og gert vel. Auðvitað frábært þegar hún skoraði þetta mark gegn Serbíu, hún gerði vel í þeim leik. Hún er að taka hæg og róleg skref í þessu, er að styrkjast og verða betri og betri," sagði Steini.

Sigur í síðasta leik gegn Póllandi Ísland mætti Póllandi síðast í undirbúning fyrir Evrópumótið 2022 og vann þá 3-1 sigur. Gunnhildur Yrsa Jónsdóttir, sem er í dag styrktarþjálfari Íslands, var okkar besti leikmaður í þeim leik.

Hvernig á að stoppa stjörnu pólska liðsins? Ewa Pajor, liðsfélagi Sveindísar Jane Jónsdóttur hjá Wolfsburg, mætir á Kópavogsvöll í dag með pólska landsliðinu. Pajor er 27 ára framherji, frekar lágvaxin, en ofboðslega öflug fyrir framan mark andstæðinganna. Í 75 landsleikjum hefur hún skorað 59 mörk.

„Hún er náttúrulega einn af betri framherjum heimsins í dag. Hún er fljót, klár, gríðarlega vinnusöm, vinnur mikla vinnu bæði með og án bolta. Hún er klárlega þeirra langbesti leikmaður og við þurfum alltaf að hafa augu á henni. Það er alltaf gaman að spila á móti þannig leikmönnum og þetta verður bara skemmtilegt verkefni."

„Hún leitar mikið á bakvið línu, ótrúlega góð að taka hlaup bakvið og koma svo á móti og fá boltann í fætur. Inni í teignum er hún góð, leyfir manni ekki að dekka sig, er alltaf á hreyfingu og reynir að vera á blindu hliðinni þar sem erfitt er að fylgjast með henni. Ég held hún sé mikilvægasti leikmaðurinn í liðinu þeirra, en samt sem áður eru þær með aðra leikmenn líka og þetta verður hörkuverkefni," sagði Glódís Perla Viggósdóttir, landsliðsfyrirliði, á fréttamannafundi í gær.

Nýju landsliðstreyjurnar frumsýndar Fyrsti landsleikurinn í nýju landsliðstreyjunum er í dag.

Fanney Inga mætt aftur í hópinn Fanney Inga var í stúkunni í síðasta leik vegna meiðsla en er núna mætt aftur sem eru frábær tíðindi.

Hver verður í markinu? Fótbolti.net spáir því að það verði tvær breytingar á byrjunarliði Íslands frá síðasta leik gegn Serbíu.

Þrátt fyrir að hafa misst af talsverðum hluta undirbúningsins spáum við því að Sædís Rún Heiðarsdóttir verði í byrjunarliðinu líkt og í síðasta leik. Sandra María Jessen er einnig kostur í vinstri bakvörðinn.

Við spáum því að Fanney Inga Birkisdóttir verði í markinu en Telma Ívarsdóttir hefur varið mark liðsins í síðustu leikjum. Hin breytingin yrði svo sú að Diljá Ýr Zomers kæmi inn fyrir Ólöfu Sigríði Kristinsdóttur. Bryndís Arna Níelsdóttir, sem skoraði gegn Serbíu, er einnig ansi líklegur kostur í framlínuna.

Ekkert að Sædísi Landsliðsþjálfarinn Þorsteinn Halldórsson greindi frá því á fréttamannafundi í gær að Sædís Rún Heiðarsdóttir væri mætt í hópinn og væri klár í slaginn fyrir leikinn gegn Póllandi. Sædís var valin í upphaflega hópinn fyrir leikina gegn Póllandi og Þýskalandi en það þurfti að kalla inn leikmann í stað hennar þar talið var að hún gæti ekki spilað vegna meiðsla.

,,Sædís er heil heilsu. Eftir myndatöku hérna heima kom í ljós að það er í raun ekkert að henni," sagði Þorsteinn.

Viðtöl fyrir leikinn

Hvernig komumst við á EM? Ísland vann dramatískan 2-1 sigur á Serbíu fyrr á þessu ári til að halda sér í A-deild Þjóðadeildarinnar. Sú keppni tengist núna undankeppni Evrópumótsins þar sem búið er að taka upp nýtt fyrirkomulag.

Með því að vera áfram í A-deild erum við allavega örugg í umspil fyrir næsta stórmót en við eigum þá líka möguleika á að komast beint inn á Evrópumótið. Ef við hefðum fallið í B-deild þá hefði það ekki verið raunin.

Við förum í A-deild undankeppninnar og mætum öðrum liðum úr þeirri deild í riðlakeppni. Það verða erfiðari leikir en möguleikarnir okkar verða betri.

Liðin í fyrsta og öðru sæti í sínum riðlum í A-deild komast beint á EM en liðin átta í þriðja og fjórða sæti mæta átta bestu liðunum úr C-deild í umspili. Sex bestu liðin úr B-deild fara einnig í umspil við sex næstbestu liðin úr B-deild. Það komast svo sex lið áfram þar og átta lið áfram úr A- og C-deild. Fjórtán lið munu því leika í sjö einvígum í umspili um sæti á EM en Sviss kemst beint á mótið sem gestgjafi.

Ísland hefði ekki getað verið heppnara með riðil og á góðan möguleika á því að komast beint á mótið.

Leikir Íslands í undankeppni EM 2025:
Ísland - Pólland föstudaginn 5. apríl
Þýskaland - Ísland þriðjudaginn 9. apríl
Austurríki - Ísland föstudaginn 31. maí
Ísland - Austurríki þriðjudaginn 4. júní
Ísland - Þýskaland föstudaginn 12. júlí
Pólland - Ísland þriðjudaginn 16. júlí

Uppselt á Kópavogsvelli Leikið er á Kópavogsvelli þar sem Laugardalsvöllur er ekki leikhæfur.

Uppselt er í öll sæti á Kópavogsvelli en leikvangurinn tekur 1.709 manns í sæti. Ísland vann Serbíu á vellinum þegar stelpurnar okkar léku í umspili í Þjóðadeildinni fyrr á þessu ári.

Góðan daginn! Og verið velkomin í beina textalýsingu frá leik Íslands og Póllands. Þetta er fyrsti leikur Íslands í undankeppni Evrópumótsins.