ÍA er búið að tryggja sér öfluga og leikreynda Valsstelpu að láni í sumar. Guðrún Karítas Sigurðardóttir mun spila á Skaganum og verður vafalítið gríðarlega mikill liðsstyrkur fyrir ÍA sem er með tvö stig eftir tvær umferðir í Lengjudeildinni.
Guðrún Karítas hefur verið að glíma við meiðsli á ökkla og fer upp á Skaga í einn mánuð til að komast aftur í leikform.
Hún hóf ferilinn með ÍA en lék fyrir Stjörnuna og KR áður en hún hélt í Hlíðarnar til að spila með Val 2018.
Guðrún hefur spilað í efstu deild síðustu sex ár og býr yfir dýrmætri reynslu. Hún á 48 keppnisleiki að baki fyrir ÍA, 34 fyrir Stjörnuna, 25 fyrir Val og 17 fyrir KR.
Þá hefur hún spilað fyrir öll yngri landslið Íslands frá U16 til U19.
Athugasemdir