Mame Biram Diouf, fyrrum leikmaður Manchester United, tók að sér öðruvísi hlutverk er lið hans, Hatayaspor, komst áfram í tyrkneska bikarnum í gær.
Diouf var á mála hjá United frá 2009 til 2012 en hann hefur einnig spilað fyrir Hannover, Molde, Blackburn og Stoke.
Hann er í dag að spila með tyrkneska úrvalsdeildarliðinu Hatyaspor og þurfti að spila stöðu sem hann er alls ekki vanur að spila.
Markvörður Hatayaspor, Abdullah Yigiter, var rekinn af velli í uppbótartíma síðari hálfleiks og fór Diouf í markið. Hatayaspor gat notað aukaskiptingu í framlengingunni og stóð hann því aðeins í nokkrar mínútur í markinu.
Það vildi þó ekki betur til en að Yavuz Bugar Boyar, varamarkvörður Hatayaspor, lét einnig reka sig af velli undir lok framlengingarinnar og fór Diouf því aftur í markið fyrir vítakeppnina.
Þar stóð hann sig eins og hetja, þó svo hann hafi ekki varið eina spyrnu. Hann skoraði sjálfur úr fyrstu spyrnunni og andstæðingurinn skaut þá framhjá markinu í næstu spyrnu.
Hann var í boltanum í þriðju spyrnu gestanna en skutlaði sér svo í kolrangt horn í fimmtu spyrnunni en heppnin var með honum því sú spyrna fór í stöngina og Hatayaspor áfram í næstu umferð, 5-4.
Incroyable Mame Birame Diouf 😭😭🤩🤩🤩🤩 >>> Edouard Mandy pic.twitter.com/tO5xuWsgQL
— 🦁👨🏿💻🖖🏿 (@NdiayeGaindeSn1) December 1, 2021
Athugasemdir