Íslenska kvennalandsliðið mætir Dönum í dag

Íslenska kvennalandsliðið mætir Dönum í vináttuleik á Pinatar-leikvanginum í Murcia á Spáni í dag. Leikurinn hefst klukkan 17:00 og er í beinni útsendingu í Sjónvarpi Símans.

Leikurinn er sá síðasti sem landsliðið spilar á þessu ári og er hluti af undirbúningnum fyrir Evrópumótið í Sviss.

Ísland gerði markalaust jafntefli við Kanada fyrir helgi og spilar nú við sterkt landslið Danmerkur.

Þjóðirnar mættust síðast í Þjóðadeildinni á síðasta ári. Danmörk vann fyrri leikinn á Laugardalsvelli, 1-0, en Ísland tók sigur í síðari leiknum með sömu markatölu.