Arsenal staðfestir nýjan samning við Martinelli

Arsenal hefur staðfest nýjan samning við brasilíska sóknarleikmanninn Gabriel Martinelli. Þessi 21 árs leikmaður er nú samningsbundinn til 2027 en hann er á sínu fjórða tímabili hjá félaginu.

Hann er í stóru hlutverki hjá Mikel Arteta og var í brasilíska landsliðinu á HM í Katar. Hann hefur skorað sjö mörk í 27 leikjum í öllum keppnum fyrir Arsenal á þessu tímabili.

„Við erum í skýjunum með að Gabi hafi skrifað undir nýjan langtímasamning," segir Mikel Arteta, stjóri Arsenal.

„Stuðningsmenn okkar sjá gæðin í honum og kraftinn sem hann gefur í hvert sinn sem hann klæðist treyjunni. Hann er eins á hverjum degi á æfingasvæðinu. Gabi er enn mjög ungur svo við vitum að það mun mikið meira koma frá honum. Við erum á þessu ferðalagi saman."

Arsenal er á toppi ensku úrvalsdeildarinnar en liðið mætir Everton í hádeginu á morgun.