Haukar eru á toppnum í 2. deild kvenna eftir að hafa unnið Einherja með þremur mörkum gegn engu á Ásvöllum í gær.

Fyrsta mark Hauka kom ekki fyrr en á 42. mínútu er Ragnheiður Þórunn Jónsdóttir kom boltanum í netið og aðeins tveimur mínútum síðar bætti Edda Mjöll Karlsdóttir við öðru.

Hún gerði síðan annað mark sitt í byrjun síðari hálfleiks en þetta var fjórða mark hennar í deildinni í sumar.

Haukar eru með 14 stig á toppnum og áfram taplausar en Einherji með 9 stig í 4. sæti.