Svissneski landsliðsmaðurinn Granit Xhaka mun skrifa undir þriggja ára samning við Arsenal á næstu dögum. Athletic, einn áreiðanlegasti miðill Englands, segir frá þessu.
Þessi 28 ára gamli miðjumaður hefur verið á mála hjá Arsenal frá 2016 en hann kom frá þýska liðinu Borussia Monchengladbach.
Hann hefur gengið í gegnum skin og skúrir hjá Arsenal á tíma sínum þar. Xhaka var gerður að fyrirliða fyrir tæpum tveimur árum síðan en mánuði síðar var fyrirliðabandið tekið af honum eftir að hann lenti í orðaskaki við stuðningsmenn í leik gegn Crystal Palace.
Xhaka hefur tekist að vaxa sem leikmaður og var meðal annars einn besti leikmaður Sviss á EM í sumar þar sem liðið fór í 8-liða úrslit.
Hann var talinn á leið til Roma á Ítalíu og var það nánast frágengið áðru en Arsenal sannfærði hann um að vera áfram. Xhaka mun gera nýjan þriggja ára samning við félagið og samkvæmt Athletic verður samkomulagið tilkynnt á næstu dögum.
Athugasemdir