Ari í Haraldstovu heldur sæti sínu í færeyska hópnum

Ari í Haraldsstovu Petersen, leikmaður ÍBV, er í færeyska landsliðshópnum sem er að fara að mæta Slóvakíu og Moldóvu í C-deild Þjóðadeildarinnar.

Hann var líka í hópnum í síðasta glugga en sat á bekknum í öllum fjórum leikjunum þar sem aðalmarkvörður Færeyja, Mattias Heðinsson Lamhauge, stóð vaktina í rammanum.

Ari varði mark ÍBV í sumar en liðið endaði í neðsta sæti Bestu deildarinnar.

Hér að neðan má sjá hvernig færeyski hópurinn er mannaður. Gunnar Vatnhamar er á sínum stað og þá eiga nýkrýndir Færeyjameistarar NSÍ í Runavík fjóra leikmenn í hópnum en liðið hefur gert frábæra hluti undir stjórn Sigurðar Ragnars Eyjólfssonar.

Færeyjar eru í öðru sæti riðilsins með fjögur stig en Slóvakía er á toppnum með tíu. Moldóva er einnig með fjögur stig og Kasakstan rekur svo lestina með aðeins tvö stig.