Besta deildin: ÍBV vann tíu leikmenn Vals

Valur heimsótti ÍBV í Bestu deildinni í dag. Chris Brazell stýrði Val í fyrsta sinn eftir að Hermann Hreiðarsson var látinn taka pokann sinn. Liðið heimsótti heita Eyjamenn sem voru taplausir í fimm leikjum í röð fyrir leik dagsins.

Fyrri hálfleikurinn var nokkuð rólegur. Eyjamenn náðu forystunni eftir tæplega klukkutíma leik.

Bjarki Björn Gunnarsson átti fyrirgjöf á Alex Frey Hilmarsson sem stóð inn í markteignum og skoraði af öryggi.

Stuttu síðar bættist grátt ofan á svart hjá Valsmönnum þar sem fyrirliðinn Hólmar Örn Eyjólfsson fékk að líta rauða spjaldið eftir viðskipti við Alex Frey.

Omar Sowe kom inn á af krafti. Hann átti sendingu á Bjarka Björn en skot hans framhjá. Sowe komst í færi stuttu síðar en Frederik Schram varði frábærlega frá honum.

Tryggvi Hrafn Haraldsson fékk dauðafæri fyrir Valsmenn en skotið arfaslakt beint á Ara I Haraldstovu.

Nær komust þeir ekki og frábær sigur ÍBV staðreynd. ÍBV er komið upp í 7. sæti með 15 stig eftir 13 umferðir. Valur er í 5. sæti með 19 stig eftir 14 umferðir.