Hörður er ánægður með byrjun sína í rússnesku úrvalsdeildinni og segir að sér hafi gengið persónulega vel í upphafi móts.

„Auðvitað langar mannig að skora meira en það kemur vonandi á þessu tímabili. Ég er kominn með tvö mörk núna en vonandi bæti ég við 2-3 mörkum í viðbót. Það verður spennandi að sjá hvernig þetta fer. Við erum með ungan hóp og það er skemmtilegt að vera aldursforsetinn."

Ljóst er að sóknarleikmaðurinn ungi Arnór Sigurðsson, liðsfélagi Harðar hjá CSKA verður ekki með í landsleikjunum gegn Moldóvu og Albaníu vegna meiðsla.

„Það er leiðinlegt að hann meiddist og hann hefur verið frá í síðustu leikjum. Hann er mikilvægur hlekkur í CSKA og í landsliðinu. Vonandi verður batinn hans góður fyrir fyrsta leik eftir landsleikina. Við eigum Evrópudeildina í september og vonandi verður hann klár fyrir þá leiki," sagði Hörður Björgvin sem segir Arnór geta náð langt á sínum ferli.

„Hann er með hausinn í lagi. Hann er ungur og óreyndur, hann þarf reynslu og að fá að spila eins mikið og hann getur. Það er auðvitað plús að vera orðaður við Napoli og fleiri önnur lið. Maður reynir að gera allt til að hjálpa honum að ná þessu flugi. Hann hefur verið á góðu flugi en svo koma meiðslin í sumar. Nú er bara að keyra hann aftur í gang og ná að henda honum aftur á loft."

Viðtalið við Hörð Björgvin má sjá í sjónvarpinu hér að ofan.