Besta deild kvenna: Ótrúlegur endurkomusigur hjá Breiðabliki í toppslagnum

Breiðablik fékk FH í heimsókn í toppslag í Bestu deild kvenna í kvöld. Fyrir leikinn var Breiðablik með fimm stiga forystu á FH á toppnum. Breiðablik hafði aðeins tapað einum leik í sumar en það var einmitt gegn FH í Kaplakrika.

Berglind Freyja Hlynsdóttir kom FH yfir snemma leiks eftir sendingu frá Thelmu Lóu Hermannsdóttir. Blikar voru með góð tök á leiknum í kjölfarið en tókst ekki að setja boltann í netið fyrir lok fyrri hálfleiks.

Eftir tæplega klukkutíma leik fylgdi Berglind Björg Þorvaldsdóttir á eftir skoti frá Kristínu Dís Árnadóttur og skoraði en markið dæmt af vegna rangstöðu.

Tæpum tíu mínútum síðar átti Birta Georgsdóttir góða tilraun en Macy Elizabeth Enneking í marki FH varði vel. Breiðablik óð áfram í færum og undir lok venjulegs leiktíma tókst þeim að brjóta ísinn.

Birta átti skot í stöng en fékk boltann aftur og skoraði í opið markið. Samantha Smith átti skot yfir markið strax í kjölfarið. Blikar héldu áfram að herja á mark FH-inga og Birta tryggði Breiðabliki ótrúllegan endurkomusigur í blálokin þegar hún skoraði með hnitmiðuðu skoti í fjærhornið.

Breiðablik er komið með átta stiga forystu á toppnum. Liðið er með 43 stig en FH í 2. sæti með 35 stig.