England: Frábær frumraun Navas í sigri á Leeds

Fyrri leikur dagsins í ensku úrvalsdeildinni var leikur Nottingham Forest og Leeds United á The City Ground vellinum.

Keylor Navas spilaði sinn fyrsta leik fyrir Forest í dag og átti hann heldur betur eftir að koma við sögu.

Leeds byrjaði mun betur og strax á annari mínútu komst Luis Sinisterra í algjört dauðafæri en Navas varði frábærlega. Navas þurfti aftur að verja vel áður en heimamenn komust í forystu.

Brennan Johnson skoraði þá mjög smekklegt mark en hann tók boltann á lofti frá vítateigslínunni og þrumaði hornum í hornið í kjölfar fasts leikatriðis.

Þetta mark var töluvert gegn gangi leiksins en Leeds átti góð færi í fyrri hálfleiknum en Navast stóð sína plikt. Sinisterra komst í algjört dauðafæri á 33. mínútu en hitti ekki markið af stuttu færi.

Leikurinn jafnaðist út í síðari hálfleiknum og Forest náði að þétta vörnina. Weston McKennie kom inn á í liði Leeds en hann er á lánssamningi frá Juventus.

Leeds náði ekki að ógna marki heimamanna nægilega mikið undir restina og því góður sigur staðreynd hjá Nottingham Forest.

Nottingham Forest er í þrettánda sætinu með 24 stig en Leeds er í því sautjánda með 18 stig.